ନୂଆଦିଲ୍ଲୀ: ମିଛ ହତ୍ୟା ଅଭିଯୋଗରେ ଜେଲ୍କୁ ପଠାଇଲେ। ଜେଲରେ ଦିଆଗଲା ଅକଥନୀୟ ନିର୍ଯାତନା। ପାଣି କି ଖାଦ୍ୟ ସବୁ ବନ୍ଦ କରାଗଲା। ଶୌଚାଳୟ ଯିବାକୁ ବି ମିଳିଲାନି ଅନୁମତି। ଜେଲରେ ଏଭଳି ଭୟାନକ କାହାଣୀ ବଖାଣିଛନ୍ତି ଭାରତୀୟ ବଂଶୋଦ୍ଭବ ତଥା ବିଶିଷ୍ଟ ଶିଳ୍ପପତି ପଙ୍କଜ ଓସୱାଲଙ୍କ ଝିଅ ବସୁନ୍ଧରା ଓସୱାଲ। ଜେଲରେ ଥିବା ସମୟରେ ମାନବ ଅଧିକାରର ଉଲ୍ଲଂଘନ କରାଯାଇଥିଲା, ତାହା କହିଛନ୍ତି ବସୁନ୍ଧରା। ତାଙ୍କ ବିରୁଦ୍ଧରେ ହତ୍ୟା ଅଭିଯୋଗ ଆସିଥିଲା। ଏଥିପାଇଁ ତାଙ୍କୁ ଉଗାଣ୍ଡାରେ ଜେଲଦଣ୍ଡ ଦିଆଯାଇଥିଲା। ଏହି ସମୟ ମଧ୍ୟରେ ସେ ୩ ସପ୍ତାହ ବିତାଇଥିଲେ ୨୬ ବର୍ଷୀୟା ବସୁନ୍ଧରା।
ଗତ ବର୍ଷ ତାଙ୍କ ପିତା ପଙ୍କଜ ଓସୱାଲଙ୍କ ପୂର୍ବତନ କର୍ମଚାରୀ ମୁକେଶ ମେନାରିଆଙ୍କୁ ଅପହରଣ ଏବଂ ହତ୍ୟା କରିଥିବାର ମିଥ୍ୟା ଅଭିଯୋଗ ଆସିଥିଲା। ପରେ ତଦନ୍ତରୁ ଜଣାପଡିଲା ଯେ ମୁକେଶ ମେନାରିଆ ତାଞ୍ଜାନିଆରେ ଜୀବିତ ଅବସ୍ଥାରେ ମିଳିଥିଲେ।
ଗଣମାଧ୍ୟମକୁ ବସୁନ୍ଧରା କହିଥିଲେ ଯେ ମୋତେ ପୋଲିସ ପାଞ୍ଚ ଦିନ ପାଇଁ ଅଟକ ରଖିଥିଲା, କିନ୍ତୁ ମୋତେ ଆହୁରି ଦୁଇ ସପ୍ତାହ ପାଇଁ ଜେଲରେ ରଖାଯାଇଥିଲା। ସେ ଅଭିଯୋଗ କରିଥିଲେ ଯେ ମୋର ମାନବାଧିକାର ଘୋର ଉଲ୍ଲଂଘନ ହୋଇଛି। ଏହି ସମୟ ମଧ୍ୟରେ, ତାଙ୍କୁ ଗାଧୋଇବାକୁ ମଧ୍ୟ ଅନୁମତି ଦିଆଗଲା ନାହିଁ।
ସେ କହିଛନ୍ତି ଯେ ମୋତେ ଖାଦ୍ୟ ଏବଂ ପାଣି ମଧ୍ୟ ଦିଆଯାଉନଥିଲା। ମୋ ଅବସ୍ଥା ଯୋଗୁଁ ମୋତେ ଖାଦ୍ୟ, ପାଣି ଏବଂ ଅନ୍ୟାନ୍ୟ ମୌଳିକ ଆବଶ୍ୟକତା ଯୋଗାଇବା ପାଇଁ ଓକିଲମାନଙ୍କ ମାଧ୍ୟମରେ ପୋଲିସ ଅଧିକାରୀମାନଙ୍କୁ ଲାଞ୍ଚ ଦେବାକୁ ପଡିଲା। ଯାହା ଦ୍ଵାରା ମୁଁ ଖାଦ୍ୟ ଏବଂ ପାଣି ପାଇପାରିବି ଏବଂ ବଞ୍ଚିପାରିବି।
ତାଙ୍କ କହିବା ଅନୁଯାୟୀ, ଏହି ସମୟ ଏତେ କଷ୍ଟକର ଥିଲା ଯେ ତାଙ୍କୁ ଶୌଚାଳୟକୁ ଯିବାକୁ ମଧ୍ୟ ଅନୁମତି ନଥିଲା। ବସୁନ୍ଧରାଙ୍କୁ ୧ ଅକ୍ଟୋବର, ୨୦୨୪ରେ ଗିରଫ କରାଯାଇଥିଲା ଏବଂ ୨୧ ଅକ୍ଟୋବରରେ ତାଙ୍କୁ ଜାମିନ ମିଳିଥିଲା। ତାଙ୍କ କହିବା ଅନୁଯାୟୀ, ପୋଲିସ ବିନା ୱାରେଣ୍ଟରେ ତାଙ୍କ ଘର ତଲାସି କରିଥିଲା।
ସେ କହିଲେ ଯେ ଯେତେବେଳେ ମୁଁ ସେମାନଙ୍କୁ ୱାରେଣ୍ଟ ଦେଖାଇବାକୁ କହିଲି, ସେମାନେ କହିଲେ ଯେ ଆମେ ଉଗାଣ୍ଡାରେ ଅଛୁ। ଆମେ କିଛି ବି କରିପାରିବା। ତୁମେ ଆଉ ୟୁରୋପରେ ନାହଁ। ତା'ପରେ ସେମାନେ ମୋତେ ସେମାନଙ୍କ ନିର୍ଦ୍ଦେଶକଙ୍କୁ ଭେଟିବା ବାହାନାରେ ସେମାନଙ୍କ ସହିତ ଇଣ୍ଟରପୋଲ ଯିବାକୁ ବାଧ୍ୟ କଲେ। ମୁଁ ସେଦିନ ଯିବାକୁ ଚାହୁଁ ନଥିଲି, ତେଣୁ ଜଣେ ପୁରୁଷ ଅଧିକାରୀ ମୋତେ ଉଠାଇ ତାଙ୍କ ଭ୍ୟାନ ଭିତରେ ଫିଙ୍ଗି ଦେଲେ।
ବସୁନ୍ଧରା କହିଛନ୍ତି ଯେ ବୟାନ ଦେବା ପରେ, ତାଙ୍କୁ ଏକ କୋଠରୀରେ ଅଟକ ରଖାଯାଇଥିଲା ଏବଂ ୩୦ ହଜାର ଆମେରିକୀୟ ଡଲାର ଏବଂ ତାଙ୍କ ପାସପୋର୍ଟ ଦାଖଲ କରିବାକୁ କୁହାଯାଇଥିଲା। କୋର୍ଟରୁ ନିଃସର୍ତ୍ତ ମୁକ୍ତ ନିର୍ଦ୍ଦେଶ ପାଇବା ପରେ ମଧ୍ୟ ତାଙ୍କୁ ୭୨ ଘଣ୍ଟା ପାଇଁ ବେଆଇନ ହାଜତରେ ରଖାଯାଇଥିଲା। ମେନାରିଆ ଜୀବିତ ଥିବା ଜାଣିବା ପରେ ମଧ୍ୟ, ସେମାନେ ଏହି ଅଭିଯୋଗରେ ମୋତେ ଜେଲରେ ରଖିଥିଲେ। ମେନାରିଆ ଅକ୍ଟୋବର ୧୦ ତାରିଖରେ ମିଳିଥିଲା। ଗୋଟିଏ କିମ୍ବା ଦୁଇ ସପ୍ତାହ ପରେ ମୋତେ ଜାମିନ ମିଳିଗଲା।
